Esa-Jussi Salminen

Удмурт веросъёс финн кылын

 

Финн кылэ берыктэм удмурт веросъёсын бичет дасяське. Удмурт проза пумен тросгес потоз финн кылын. Татчыозь удмурт прозаысь финн кылын потэмын 4 верос гинэ: 2010-етӥ арын «Волга» антологиын потӥзы Вера Пантелеевалэн (Вероника Дорлэн) но Вятчеслав Ар-Сергилэн веросъёссы. Соос сяна 2003-етӥ арын потӥз Михаил Атамановлэн «Мынам сюресэ Библие» автобиографической книгаез. Жаляса верано, Финляндия та удысын туж бере кылемын Эстонилэсь но Венгрилэсь. 2012-етӥ арын потӥз эстон кылын удмурт проза бичет Varsti on jälle kevad. Со бордын ужазы Арво Валтон, Муш Нади но мукетъёсыз. М. Петровлэн «Вуж Мултан» романэз алигес гинэ эстон но, венгр но кылъёсын потӥз.

Таиз удмурт веросъёсъя проект туж бадӟым вамыш азьлань луоз. Веросъёс пыр финн лыдӟись трос гинэ тодоз удмурт калык но солэн улон сюресэз сярысь.

Бичетэ пыртэмын 37 веросчиослэн быдэн одӥг вероссы. Соосты туж сак быръёно луиз: вань веросчиосты но басьтыны уг луы, котькуд гожъяськисьлэсь трос усто веросъёсыз  пӧлысь одӥгзэ гинэ быръёно. Умой удмурт веросчиос сокем трос –  мукет бичетъёс понна но материал кыле на.


Та финн кылын бичет, идеяысен кутскыса ик, мынам уже луэ. Удмурт кылэз 1992-етӥ арысен дышетӥсько, удмурт литератураез но удмурт кылын трос лыдӟисько, 1997-етӥ арысен кутскыса, литератураез быдэс удмурт культура контекстын эскерисько бере, веросъёсты но, конечно, ачим бырйи. Соосты ачим ик меӵак удмурт кылысь финн кылэ  берыктӥсько. Конечно, уже кутӥсько Удмуртиысь но, Финляндиысь но ӧнерчиослэсь тодон-валанъёссэс. Та бичетэ веросъёсты гинэ пыртӥсько. Кылсярысь, Елена Миннигараевалэн Чечен ожен герӟаськем гожъямез, укыр кузь шуыса, та бичетэ уг пыры; мукет ласянь, сое туж умой поттыны лусал мукет ожъёсын герӟаськем веросъёсын ӵош.


Та бичетлэн азьмугез луэ удмурт верослэсь историзэ нырысетӥ удмурт веросысен (Михаил Верещагин 1905: Тукташ) туннэ нуналозь возьматон. Соин ик веросъёс потэм дыръёссыя радъямын луозы. Бичетлэн кутсконазгес луозы репрессия улэ шедем писательёслэн веросъёссы (Кузебай Герд, Кедр Митрей, Ашальчи Оки, Константин Яковлев). Таос пӧлысь Кузебай Гердэз но Константин Яковлевез одӥг нуналэ, 1.11.1937 арын, ыбизы. Яковлевлэн 1929-етӥ арын потэм «Коньяк» веросэз удурт прозаын шер пумиськись трагикомедия луэ. Малпан кылдэ, со дыре ик автор обществоез туж лечит тышкаське.

Удмурт веросъёс пӧлын трос гинэ историлэсь трагической учыръёссэ возьматӥсьёсыз, Кафкалы но матын луисьёсыз. Куд-огъёсыз ожъёсын герӟаськемын. Соин ик бичетэ пыртэмын луозы гражданской войнаен но, нырысетӥ но, кыкетӥ но дунне ожен герӟаськем веросъёс. Финской войнаез но куд-ог веросъёсын пусъё. Ож бере но гожтэм куд-ог веросъёс ожлэсь бервылъёссэ сэртто-пертчо.

 50-етӥ аръёсысен кутскыса, тросгес но тросгес пумисько обществолэн умоезлы оскыса гожтэм веросъёс. Кылсярысь. романтической шӧмо луэ Евгений Самсоновлэн «Арама кузя» веросэз (1959-етӥ ар), кудаз веросчи Пётр Чайковскийлэн пинал дырыз сярысь маде. Озьы ке но удмурт прозаын трагической верос кыле: берло дыре со огшоры улонын луись трагедиосты шарая. Удмурт литература ачиз валэктэ, малы воргоронъёс али но куддыръя егит дыръязы улонысь кошко. Ассэ, ас калыксэ критически возьматон Кузебай Гердлэн «Матӥез» дырысен туннэ нуналозь удмурт литератураын возиськемын.


Берло дыре тросэз веросъёс йöскалык тематикаен öжытгес герӟаськемын ни луо. Малпаны луоз ини, соосты гожтӥз Италиысь яке Франциысь адами шуыса. Соос универсальноесь. Удмурт верос абстрактнойгес луэм кадь: лыдӟисьлы но аслыз мар ке но малпаны кельтэ. Озьы ке но,  алигес мыным одӥг удмурт литератураез ӟуч кылын лыдӟись егит адями вераз, солы удмурт литература кельше, малы ке шуоно со улонлы матын шуыса.


Бичетлэн пумаз луозы веросъёс,  кудъёсызлэн авторъёссы али гинэ гожъяськыны  кутскемын. Со авторъёсын пумиськыны быгатӥськомы Удмуртиын, Финляндиын, Фейсбукын но Вконтактеын но.

 

Piditkö tästä kirjoituksesta? Näytä se!

1Suosittele

Yksi käyttäjä suosittelee tätä kirjoitusta. - Näytä suosittelija

Toimituksen poiminnat

Tämän blogin suosituimmat kirjoitukset